أنا شاب لكن عمري ألف عام / وحيد لكن بين ضلوعي زحام / خايف و لكن خوفي مني أنا / أخرس و لكن قلبي مليان كلام
يا قرص شمس ما لهش قبة سما / يا ورد من غير أرض شب و نما / يا أي معني جميل سمعنا عليه / الخلق ليه عايشين حياه مؤلمة
انا كل يوم أسمع …….. فلان عذبوه / أسرح في بغداد و الجزاير واتوه / ما أعجبش م اللي يطيق بجسمه العذاب / و اعجب من اللي يطيق يعذب أخوه
خرج ابن آدم من العدم قلت : ياه / رجع ابن آدم للعدم قلت : ياه / تراب بيحيا … وحي بيصير تراب / الأصل هو الموت و الا الحياه ؟ !!!
يا باب يا مقفول … إمتي الدخول / صبرت ياما و اللي يصبر ينول / دقيت سنين … و الرد يرجع لي : مين ؟ / لو كنت عارف مين أنا كنت أقول
رقبه قزازة و قلبي فيها انحشر / شربت كاس و اتنين و خامس عشر / صاحبت ناس م الخمرة ترجع وحوش / و صاحبت ناس م الخمرة ترجع بشر
علي رجلي دم .. نظرت له ما احتملت / علي إيدي دم.. سألت ليه ؟ لم وصلت / علي كتفي دم.. و حتي علي رأسي دم / أنا كلي دم .. قتلت ؟ ….. والا اتقتلت
نوح راح لحاله و الطوفان استمر / مركبنا تايهه لسه مش لاقيه بر / آه م الطوفان وآهين يا بر الأمان / إزاي تبان و الدنيا غرقانه شر
ورا كل شباك ألف عين مفتوحين / و انا وانتي ماشيين يا غرامي الحزين / لو التصقنا نموت بضربة حجر / و لو افترقنا نموت متحسرين
سهير ليالي و ياما لفيت و طفت / و ف ليه راجع في الضلام قمت شفت / الخوف … كأنه كلب سد الطريق / و كنت عاوز أقتله .. بس خفت
أحب أعيش ولو في الغابات / أصحي كما ولدتني أمي و ابات / طائر .. حوان.. حشرة .. بشر ..بس أعيش / محلا الحياة.. حتي في هيئة نبات
عجبتني كلمة من كلام الورق / النور شرق من بين حروفها و برق / حبيت أشيلها ف قلبي .. قالت حرام / ده أنا كل قلب دخلت فيه اتحرق
ضريح رخام فيه السعيد اندفن / و حفره فيها الشريد من غير كفن / مريت عليهم .. قلت يا للعجب / لاتنين ريحتهم لها نفس العفن
ياما صادفت صحاب و ما صاحبتهمش / و كاسات خمور و شراب و ما شربتهمش / أندم علي الفرص اللي انا سبتهم / و الا علي الفرص اللي ما سبتهمش
و الكون ده كيف موجود من غير حدود / و فيه عقارب ليه و تعابين ودود / عالم مجرب فات و قال سلامات / ده ياما فيه سؤالات من غير ردود
