اليكم الجزء الثالث من الكلمات الشائعه فى مجتمعنا ونرددها بلا فهم رغم انها حرااااااااام جدا...

* كتير من الناس بيقولوا....


(انا بحب المغنى الفلانى او بعشق الممثل العلانى )


طب وايه الحرام فى كده .... هقولك بس اسالك سؤال تحب تحشر مع من فى يوم القيامه ؟؟؟

اكيد مع الرسول طبعا (صلى الله عليه وسلم) هى دى عايزه كلام


إذاً مش لازم خالص تقول انا بحب الممثل ده او المغنى ده .... < لأن المرء مع من احب > وطبعا انت ما تتمناش انك تكون مع مغنى او ممثل .

طب اومال تقول ايه ؟؟؟؟؟؟؟

قول انا بستلطفه او بسمعله او اى شىء اخر غير كلمة بحبه او بعشقه دى...
ونصيحه منى ماتسمعش اغانى من اصله ، عشان الشياطين تبعد عنك واسمع قران او اناشيد دينية احسن بدلا منها وربنا يهديك ويهدينا جميعا.



* فى ناس بتحلف بحق العيش والملح والاخوة والصداقة وحاجات تانية واحنا وضحنا فى الجزء التانى ان الحلفان بغير الله يعتبر من الشرك ، لكن بئه الغريب انك تلاقى واحد يقول....

( بحق اللى خلقك من غير مناسبه او من غير لازمه).


ودى كلمة فى غاية الخطورة، لان معنى الكلمة دى ان ربنا خلق هذا العبد على سبيل العبث او اللهو اى من غير مناسبه ومن غير لازمه ، وده غلط كبير اوى ان الواحد يقول كده ، لان ربنا سبحانه وتعالى ما بيخلقش اى حاجة على وجه الارض او فى الكون كله الا بقدر معين وبنسبة محسوبة وحسوسة لو زادت او نقصت يحصل خلل، وكل شىء من صنع الله له لازمة وله رسالة وهدف يؤديه فى حياته حتى لو كان المخلوق ده ( دودوة ) .

ده حتى نص الدعاء بيقول " ربنا ما خلقت هذا باطلا سبحانك"
يبقى ازاى ربنا خلقنا بئه من غير لازمه واحنا خلفاءه فى الارض واحنا اللى بنعمر الارض ونبنيها.

يبقى المفروض ما نقولش خالص الكلمه دى لا على الانسان ولا على الحيوانات ولا الحشرات ولا اى مخلوق فى الدنيا .




* بردو فى ناس تلاقيها تقول ايه ( وحياة اغلى حاجه عندك ) .


وده غلط عشان كده هو ممكن يوقعه فى الشرك لانه بيحلفه باغلى حاجة عنده، واحنا اتفقنا ان الحلفان بغير الله من الشرك . فالمفروض يقوله استحلفك بالله كى لا يوقعه فى الشرك .



* بردو شىء اخر لفت نظرى هو انك تلاقى واحد يقول للتانى...


( تصدق بمين او تؤمن بأيه )


لا اله الا الله هو الواحد عنده حاجه تانيه يؤمن ويصدق بيها غير ربنا ؟؟؟
فالمفروض يقوله < تصدق وتؤمن بالله> كى لايقع فى الشرك. صح وله ايه ؟؟




* كمان فى حاجه خدوا بالكم منها فى اذكار الصباح والمساء بنقول ...


( رضيت بالله ربا وبالاسلام دينا و بسيدنا محمد نبيا ورسولا كريما )


ماتقولش كريما اقف لحد رسولا بس ، والحقيقه انا مش عارفه ليه بس سمعتها من الشيخ قالها فى التليفزيون ، لكن ماعرفتش السبب . فياريت اللى يعرف ينورنا ...




*ايضا تجد ناس كتير بتقول ( ده كان يوم شؤم دى كانت ساعه ذفت ، الله يخرب بيت اليوم اللى اتولدت فيه .............. وكلام كتير اوى من ده ) صح مش بتسمع كده بردو .. بردو اللى بيقول ( يانهار اسود او كوبيه ................ وما شابه ذالك)

اهو كده هو سب الدهر واحنا اتفقنا ان الدهر = الله سبحانه وتعالى




* فى ناس بقى بيقولوا الكلمه دى ( الجواز مشروع فاشل )


ياراجل حرام عليك ...

ليه كده ؟؟ مش ربنا حلل الزواج فى القرآن فى كذا سورة ووضح لنا اسس الزواج والبيت الاسلامى ، وحق الزوج والزجه والابناء كمان ، طب اذاى توصف حاجه ربنا معززها وذاكرها فى القرآن بالفشل؟


فخلى بالك بقى لان الكلمه دى كترت . وحذر اى حد يقولها وانصحه بأنه مايقولهاش تانى .




*كمان حاجه كلنا بنقع فيها هى اننا دايما لما بنذكر اسم الرسول فى اى موضوع بنكتب(صلى) او( ص) كأختصار لكلمة صلى الله عليه وسلم.


وده حرام لانك بتنقص من قدر الرسول !!!!!!!!!


كده بردو بقى حبيبك وشفيعك فى يوم الدين تستخصر تصلى عليه ده ربنا عز وجل بيصلى عليك عشرة لما تصلى على الرسول مره ، يبقى انت بقى مستخصر فى نفسك الثواب العظيم ده كله ولا فى مين بالظبط ؟؟

و كمان خلى بالك الرسول صلى الله عليه وسلم قال( البخيل من ذكر اسمى عنده ولم يصلى علي )


فلازم تصلى عليه وتكتبها كامله وتقولها كمان كاملة وواضحة هكذا < صلى الله عليه وسلم >.

والا هتكون بخيل انت حر .



* ايضا ما تتدعيش على حد وتقوله ( نهارك مطين او يخرب بيتك او عقلك ..........).


لانك لما بتتدعى لحد او على حد فى ملاك بيقولك امين ولك مثله

وطبعا انت ماتتمناش ان يحصلك حاجه وحشه ، كمان احنا مسلمين والمسلم يحب لاخيه المسلم ما يحبه لنفسه.

فاحسن قوله روح الله يسامحك ، ولو زعلان منه اوى احتسب اجرك عند ربنا وقول حسبى الله ونعم الوكيل ، مش احسن بردو ولا ايه؟؟




* فى بئه حاجه كمان لفتت نظرى فى ناس بتقول عن النساء( دول ناقصات عقل ودين).


هى مش حرام ولا حاجه بس فاهمين غلط كلنا فاهمين ان الكلمه دى معناها ان النساء متخلفين وعقلهم صغير رغم ان المعنى المقصود غير كده خالص .... لان معناها الحقيقى ان ناقصات عقل بمعنى ان عند الشهاده فى المحكمه مثلا او لما تكون المراة شاهدة فى امضاء العقود فلازم يكون فى واحده كمان معاها يعنى مثلا رجل وامراتان يعنى الرجل بإمرأتان ، اما ناقصات دين فهى لان ياتى عليها فترة تمنع من الصلاة وقراءة القرآن .



* بردو شىء اخر اللى بيقول( ده كله من خيرك او ده كله بفضلك او ده لحم كتافى من خيره ..........وما شابه ذالك)


الكلمة دى حرام اوى، لانه نسب سبب النعمه اللى هو فيها لشخص اخر غير الله وانكر فضل الله عليه ، مع ان ربنا هو العاطى وهو اللى بيسبب الاسباب ، فطبعا ده نوع من انواع الشرك والجحود واليعاذ بالله . فبالله عليكم تجنبوا الكلمة دى تماما .




*وكتير اوى مننا يقول( انا واقع تحت رحمته ، لا يرحم ولا يسيب رحمة ربنا تنزل )


فى الامر الاول حرام عشان كده هو منتظر رحمة البشر ونسى رحمة ربنا وده غلط وبالتالى جعل لله سبحانه وتعالى نداً فى صفة الرحمة المنُتظرة، لان ربنا بس هو اللى بنطلب منه الرحمه مش من البنى ادم ، فمش لازم ابدا حد يقول انا واقع تحت رحمته.


اما الامر الثانى فكده هو جعل لرحمة الله شىء يمنعها من النزول وطبعا كلنا عارفين لا مانع لعطاء الله لعبده شىء. "و قل لن يصيبنا الا ما كتبه الله لنا ".



انتهى الجزء الثالث