منتديات الملكة سما

منتديات الملكة سما


 
الرئيسيةاليوميةس .و .جبحـثقائمة الاعضاءالمجموعاتالتسجيلدخول

( اللَّهُ لا إِلَهَ إِلَّا هُوَ الْحَيُّ الْقَيُّومُ لا تَأْخُذُهُ سِنَةٌ وَلا نَوْمٌ لَهُ مَا فِي السَّمَاوَاتِ وَمَا فِي الْأَرْضِ مَنْ ذَا الَّذِي يَشْفَعُ عِنْدَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ وَسِعَ كُرْسِيُّهُ السَّمَاوَاتِ وَالْأَرْضَ وَلا يَؤُودُهُ حِفْظُهُمَا وَهُوَ الْعَلِيُّ الْعَظِيمُ ) [البقرة:255]


شاطر | 
 

 قصه من اختراعى

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: قصه من اختراعى   الجمعة يناير 27, 2012 3:02 pm

الموضوع عبارة عن قصة يا جماعة وبطلاتها واساميهم برضه من خيالي

ببساطة ان هما شلة بنات من زمان قوي نص عمرنا قضوه مع بعض ولحد اللحظة دي ما افترقوش طول عمرهم الطويل ده مع بعض وقارفين بعض حتى اما خشوا التنسيق اتقبلوا في علمي علوم مع بعض واسميهم هتعرفوها في وسط الحكاوي مع كل بنت هتقولنا وهتكلمنا عن نفسها وحياتها

ديما مع بعض في المدرسة وامنياتنا واحده تتلخص في اننا نخلص من المدرسة بقى وكل واحده تشوف حياتها ومستقبلها طبعنا وحياتنا مختلفه وبنتمنى نبقى مع بعض على طول وما نتفرقش حتى لو فرقتنا الأيام وكل واحد اتقبلت في كلية مختلفه صحيح كتير جدا بنتخانق لكن بنحب بعض جدا وبنخاف على بعض قووووووي
احنا قولنا ايه بقى اننا هنقعد قعدة القعدة دي هنفضفض بيها بجد عن كل اللي عايزينه ومن حقوكوا بس تسمعونا وتحكموا علينا هنقول احاسيس ومشاعر هنقول حجات تفرح وسعات تبكي حكاوي بنوتات في فسحة مدرسة ثانوي بيشيلوا الأدراج وبيقعدوا حلقه حوالين وجمب بعض قفلين عليهم فصلهم وبيقولوا لبعض اسرار ويمكن تفاصيل لحكاوي مهمه وسعات تافهه هيقولوا ايه هتقروا بعينكم







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: الفصل الاول   الجمعة يناير 27, 2012 3:05 pm

بصوا خلونا نتفق على حاجه من البدايه اول شيء هنتطرق لشخصيات القصة بمعنى هنتعرف الأول على شخصيات القصة دي كل بنت هتكلمنا عن نفسها في سطور بعد اما نخلص تعرفنا عليهم هنتطرق لكلام كل واحده فيهم في الحب ونظرتها ليه ازاي هنشوف الموضوع هياخدنا لغاية فين اوك


هنبتدي باول قصة هتكون مع المغرورة بتاعت الشله ههههههه بلاش مغرورة لأنها بتدايق منها حرام نخليها المتفائلة بتاعت الشله دي واللي عايشاها بالطول والعرض مش فارقة معاها خالص وطول ما هي قاعده بتتكلم عن امجادها وحياتها معاكم ساندرا في سطور قصتك

البنات : ساندرا يللا يا ساندرا انتي اول واحده هكلمينا عنك اكتر


اسمعوا بقى انا اسمي ساندرا شعبان شركس اول واحده هكلمكوا النهرده بعشق اسمي جدا وجيبلي الحظ على طول مش محجبه وهاتحجب اما اتجوز بس ان شاء الله
عضوه في نادي للرقص الشعبي والتراث وبعزف الة الساكسفون شوفوا التناقض هههههههه تراث شرقي وساكسفون غربي يلله اهو تنويع نظري ضعيف سنه من كتر المذاكره وبلبس نضارة وسعات لينسيز لو برقص في النادي

وقتي كله مشغول والنادي بتاعي هوا مكاني المفضل وزملاتي هنا وهناك هما كل حياتي النادي بقى يومين في الاسبوع ولو في حفله وبروفات يبقى من 3 ل 4 ايام في الأسبوع وايام الأمتحانات بقى بغطرش لان عرفين ثانوي يعني ايه وعايز تركيز قد ايه .
في ناس بتعتبرني صايعه علشان برقص مع شبان في النادي ولو انه رقص شعبي وتراث وناس تانيه عادي مش بتعترض ولا بترفض وانا منفضه للأتنين ما يهمنيش الا الحاجه اللي بحبها والرقص ده بقى في دمي حاجه ما اقدرش استغنى عنها الا بمعجزة

منظمه وقتي بين 5 حجات المدرسه والنادي والبيت و صحابي و .....

البنات : مين يا هانم


ههههههههه المهم المهم بابايا دكتور باطنه والحمد لله وضعنا المادي ميسور وماما محاميه و ليا اختي الكبيرة اسمها ميرنا واخ صغنن اسمه زيد بحب الحياة جدا وعيشاها من غير تعقيد بحس ان كل البنات اللي في سني بيبصولي وبيقلدوني في كل حاجه لبسي ومشيتي وتسريحة شعري حتى شنطتي لو جيبت بنطلون الاقي موديله تاني يوم على 10 بنات ولو شريت جزمة الاقيها في رجل ميت بنت بعد يومين افخر بنفسي وبذوقي والكل ديما بيبصلي بنظرة المدللة اللي مش محرومة من حاجه علشان وضعي الأجتماعي لكن انا مش كده

والدتي هي سرنا العميق تعرف كل حاجه عننا و واخده بالها مننا كويس جدا ومربيانا على الثقه في النفس وحب الحياة بصراحه امي هي اللي ممشيه البيت هنا بقوة شخصيتها وتحديها واحنا وخدين القوة منها عموما والدي موجود تحصيل حاصل وما بيرفضلناش طلب بتاتا هههههههههههههه ماما مسيطرة عليه شويه ما علينا ما علينا بس الحمد لله ممشينها احنا وبفخر عائله مثاليه جدااااااااااااااا ما اقلكوش


كل مدرساتي بقى بيعشقوني زي ما انتم عارفين طبعا لأني ضروري اجيب الفل مارك في كل المواد

ايه تاني نسيت اقلكم عليه طبعا بالنسيه للعيله فنا بعشق اعمامي واخوالي بجد بطريقة فظيعه لأنهم زينا تمام في طباعنا وحياتنا هما كل دنيتي ومتربين مع اولادهم من واحنا صغيرين وكل نهاية اسبوع لازم نتجمع من اول اليوم لأخرة نروح نتفسح و نتغدا ونلعب ونروح سينما وسعات اما بيبقى عندي حفله في النادي بيجوا كلهم يشجعوني ويسقفولي معاهم بقضي احلى اوقات في دنيتي ده غير طبعا معاكم انتم حاجه تانيه صدقوني .


عندي ميول فنيه فظيعه زي منتم عارفين اننا بعزف ساكسفون بس ده بناء على رغبة ماما مش رغبتي انا كان نفسي اعزف بيانو بس هي قالتلي بعدين بحب من المغنيين فرقة باك ستريت بويز وسيلين ديون وانريكه جلاسيس وعمرو دياب ومن الممثلين توم كروز و ديكابريو ده شور وابو عضلات ده اسمه ايه فندام ما تعرفوش ليه بس بحب ثمثيلة جدا واحمد عز وناس كتير جدا ...

قوضتي مملكتي ولو جيتوا زرتوني هتلاقوا كل الناس اللي قلتلكم عليهم دول فوق مغرقين حيطان المملكة و كتير ياما من صحابنا نفسهم يعرفوا سر القوضه دي لكن ديما بيطلعوا منها على مافيش


هوايتي بقى البعزقة بحب اروح المحلات واشتري كل اللي نفسي فيه ماما مش حرمانا من حاجه بتاتا بحب جدا الأكسسوارات والتوك والانسيالات والخلاخيل وبعشق الوان المنكير الغريبه و بهتم بنفسي جدا ومش بخلي نفسي في حاجه ما بحبش المكياج خالص ببساطة لأني مش محتجاله ومش بحب البنات اللي بتبقى زي المهرج مغرقه نفسها مكياج ده بجد حاجه بتعصبني

اكتر حاجه بحلم بيها اننا اخلص مدرسة بقى واكمل في الجامعه صيدلة واعيش بقى مع الحد اللي ختاروا قلبي

البنات : ايووووووووووه بقى قوليلنا بقى اتعرفتي عليه ازاي

هههههههههههههههه ده بقى زميلي في النادي مستواه الاجتماعي زينا تقريبا وساكن قريب مننا اما كان يجي الباص علشان يخدني من قدام البيت كان بيبقى مفضيلي الكرسي اللي جمبه ديما علشان يكلمني وبكده اتعرفنا

البنات : وقالك انه بيحبك ازاي وانتي بتحبيه يبت ؟

ده بيعشقني بيحبني موووت مووووت وانا الأول ما كنتش مدياله اي اهتمام ولا معبراه خالص بس بعد كده اتعودت عليه

هوا قدنا

لاء ده سنه اولى في الجامعه وبيدرس في كلية تجارة اتعرفت عليه من 8 شهور تقريبا وكان يعيني مشغول ف الأمتحانات ويا دوب كنا وقتها بنتكلم خفيف جدا اما دلوقتي تليفونات بقى ونت والنادي وهيصه يعني لو ما شفتوش اليومين اللي فالأسبوع دول ببقى هطق بس طبعا مش ببينله ده هوا كمان بيحبني كتير جدا وبيبقى هيتفرتك اما ما بيشفنيش وبيكلمني يجي ميت مرة في اليوم

الحاجه الوحيده اللي بتديقني بقى اما بسمع حد بيقول عني اننا متكبره او مغرورة او اننا ما بكلمش الا المستويات من الناس علشان مظهري يدل على كده وده غلط على فكره انا حد بحب كل الناس مش ذمبي اننا مش باخد على الناس بسهوله وبحب اهتم بنفسي كويس قوي وابسط الأشياء تجنن عليا


عيبي بقى واللي كل الناس بتكرهه فيا اننا كثيرة النقد وسعات بيقولولي انها مش بتفضل عبارة عن نقد دي بتتعدى لحد الوقاحه وجرح لمشاعر الآخرين بس انا مش ببقى اقصد ده خالص سعات بحاول ابعد عن الصفه دي فيا لكن اعتقد ان دي بقى بقت حاجه في شخصيتي ما اعرفش اشوف حاجه مش مظبوطه وما اعلقش
مره كنا في بيت سين من البنات ههههههه من غير ذكر اسامي على فكره مش معانا لتفتكروا لقيت بيتها كلوا تراااااااب مسكته كده بصباعي وقلتلها ما تنضفي بيتكم كويس حسيتها اديقت بس بجد مش ببقى اقصد طلعت الكلمة مني عفوية

عرفين مشكلتي فين اننا اتعودت من ماما ديما على السيطرة وخصوصا على اللي اضعف مني او مش اضعف لاء هوا زي ما تقولوا سيطرة وخلاص حق بقى باطل المهم اننا اكون ديما في الأول والأحسن مهما كان التمن يمكن سيطرة ماما على بابا واللي المفروض ان بابا يبقى الحلقة الأقوى في العيله دي ههههههههههههههه حلوة الحلقة الأقوى دي هوا اللي مخليني كده المفروض انها قوة شخصيه بس انا بيبقى نفسي في حجات تحصل يكون لبابا فيها الكلمة مش ماما ويبقى نفسي الاقي بجد حد يسيطر عليا وعلى شخصيتي ويفرض قوته عليا مش معنى اننا احب اكون تابعه لحد لاء ابدا بس نفسي احس ان حد طاغي كده بشخصيته عليا وده مش لاقياه

الحمد لله ما عنديش مشاكل خالص خالص كله سالك بحمد الله لحد دلوقتي ولو صدفتني مشكله هبقى اقلكم عليها في نص الحكاوي هي دي انا في سطور بسيطه حد عنده سؤال حد عنده تعليق ههههههههههههههههه لا طبعا خلاص خدوا بقى المايك تعبتوني الدور على مين الدور على مين

الدور عليكي يا ميسون ومعاكي المايك







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: الفصل الثانى   الجمعة يناير 27, 2012 3:07 pm

دلوقتي دور ميسون وهي صفتها بين البنات المغلوب على امرها والمظلومه اتعرفوا معانا على ميسون

البنات : دورك بقى يا ميسون عرفي الناس بيكي اكتر


ميسون انا بقى امهم القلب الحنين في الشله دي كلهم بيلجاولي في مشاكلهم وانا اللي كلي مشاكل اسمي ميسون احمد محمد محجبة وعنيا زرقا هههههههههههه

البنات بيبصولها نظرة غريبه تدل على كذبها

ههههههههههه خلاص خلاص هقول والله من غير تهريج عنيا سوده اهو صح والا بكدب

عندي 5 اخوات شباب وكلهم اكبر مني وانا البنت الوحيده وسطهم ده طبعا غير بابا و ماما اما شغلانتي بعيد عن المدرسه فهي الشغاله بتاعتهم في البيت ده هريني طلبات

نسيت اقلكم اننا نص حياتي معاهم عيشاها عياط والسبب هما برده ما تعمليش ما تخرجيش ما تمسيكيش التليفون استني اما تسألي اخوكي فلان عيشتي في وسط كله رجاله خلاني بقيت زيهم راجل بس مخلوق على هيئة بنت مع فرق انهم بيتحكموا فيا اوي وانا مش عارفه اتحكم في حد يا مين يمسكني رقبيهم كلهم في يوم من الأيام هههههههههههه اه ياني على همي ضغطوا عليا وعلى اعصابي بقيت بكره العيشه معاهم انا ما بحبش اقعد معاهم وديما في قوضتي وقافله عليا بابي ومتجنباهم تماما بس على مين مش بيسيبوني في حالي ورايا ورايا مطرح ما اروح ورايا وماما منفضه ليا وليهم بس بتحوش عني سعات اما بيتغابوا عليا

اقلكم على حاجه مره تليفون البيت رن وما كنش في حد في بيتنا يرد الا ماما وكانت في المطبخ ورديت على التليفون في دخلت اخويا حسام من باب البيت يالهوي على اللي عمله ده هراني ضرب وتهزيء وشتيمه وماما تحوش عني وتبعده وهوا يزيد وكأني كنت بكلم راجل في التليفون على فكره انا بكرهه جدا ومش بحبه خالص لا هوا ولا حد منهم اوووووف ربنا يخلصني من وشهم كلهم على خير

بابا بقى نفس الطبع والطريقة ونفس الأسلوب معاهم كلهم اسمعه بيعلي صوته على ماما وبيشخط في خواتي ومره ضرب اخويا حسام اما لقاه مره زعق في ماما الا انا ما بيجيش جمبي نهائي ويسأل ماما تسألني لو عايزه اي حاجه بس انا مش عايزه غير انهم يسيبوني في حالي

انا عايشه في بيت كله وحوش ما حدش فيهم بيتعامل معايا كأنسانه وما بيعرفوش يتعاملوا معايا الا بلغتين لغة الصوت ولغة الأيد تعبت قوي وفي نفس الوقت نفسي اخرج من تحكمهم وحصارهم ليا بالطريقة دي بس خايفه اخرج من هنا اروح لحد تاني اسوء واعنف يمسيني بعلقه ويصبحني بعلقه بقت ثقتي في نفسي معدومه اخاف اتكلم اخاف اقول رأيي اخاف اتنفس وهما موجودين نفسي اترمي في حضن حد حنين عليا يطبطب عليا ويحميني من الناس دي يحميني بجد من كل لحظة الم عشتها مع العيله دي

اما امي بتكلمني تقولي اصل خواتك خيفين عليكي من اللي بيشفوه في الشارع والدنيا دي وحشه يبنتي ما تزعليش انتي بس
تصدقوا اننا ببقى نفسي اشوف العالم ده اللي بره وخيفن عليا منه عامل ازاي نفسي اكتشفه واشوفه افهمه اشوف عيوبه وحسناته انا بصراحه خلاص اتخنقت منهم ونفسي اسيبلهم البيت كله واخرج لحد يفهمني ويعيشني براحتي



اقلكم على سر لاء لاء لاء خلاص بلاش


البنات : لاء قولي والنبي لنتي قايله

مره في العيد خرجت انا وبنت عمي نتمشى ورحنا نشرب نيسكافيه في كوفي شوب بعيد شويه عن بيت عمي وهناك اتكلمت مع واحد هههههههه

البنات : ههههههههههههههههه والله ايه ايه العمله المهببه دي لاء لاء لاء مالكيش حق دي عمله فظيعه

انتم بتتريقوا والله اتكلمنا وقعد معانا كمان على الطاوله وطلب نمرة تليفوني هههههههههههه واديتله نمره من دماغي الله اعلم بقى مين شرب المقلب بقى ورد عليه


محدش فاضيلي اصلا امي وغرقانه في مشاكلها مع اهلها واهل بابا واخواتي زي ما انتم شيفين اهو وبابا منفضلي اساسا ولا حتى كأني بنته عارفين كان نفسي يبقالي اخت بنت معايا اتقاسم معاها المرار وتقاسمني وسريري واكلي ومزاكرتي ونقعد نرغي مع بعض للفجر تقولي يعني ايه احب وانا اشكيها همي وابكي في حضنها بس اهو ربنا رزقني بسم الله ما شاء الله بكل دول وكلهم اخواتي وحبيباتي بس مش دايقين نفس مراري

ماليش اوي اهتمامات بس بحب جدا امشي الصبح بحس اننا خلصت من قيودهم في هوا النهار بروح المدرسة مشي وبحب اسمع اغاني وارقص لوحدي قدام المراية اقفل عليا باب قوضتي واديها رقص لحد ما اتهد وانخمد مره اخويا حسام الهي يارب ..... المهم خش عليا لقاني برقص قام قفل التسجيل وقالي زكري بلاش كلام فارغ مش عايز اسمع صوته ده نهائي دلع بنات
انا بكرهه على فكره موت  ربنا يخلصني من وشك العكر يا حسام يارب

انا ايا هيكون عذابي اما هتجوز وطلع وحش هيبقى ارحم من العذاب اللي انا عيشاه هنا في البيت ده وبعيشه كل يوم بس هي دي انا في سطور اما يجي الدور عليا تاني يمكن اقلكم على سر تاني زي الأولاني بس كده انا ميسون في سطور
معاكي المايك يا علا







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: الفصل الثالث   الجمعة يناير 27, 2012 3:09 pm

البنات : دورك يا علا اتفضلي


انا بقى علا السيد مصطفى عشت واتربيت من صغري في دار للأيتام اتولدت يتيمه وعشت كام سنة مع والدي لحد ما بقى عندي 6 سنين وبعدها مات في حادثة وجيرانا اما عرفوا بالخبر حطوني في الدار دي وطبعا بسبب ان الناس ما خلفونيش نسيوني وهمهم على قدهم واهو مكان بحيطان ياويني احسن من الشارع

اللي في الدار دولت وبكل بساطه هما كل حياتي غلابه زيي وعيشين نفس ظروفي وحياتي عشنا محرومين من كلمة ماما وبابا وهنكبر واحنا مع بعض وفي حضن بعض نوعي بعض وننصح بعض كلمتنا دوا وزعلنا الم ووجع ما بحلمش كتير ببكره لأن عارفه ان المجهول لسه ياما مخبيلي كتيربس بتمنى ما يجيش عليا اليوم اللي اما اتخرج ابعد عن اخواتي وبناتي الصغننين اللي في الدار هنا واللي بحبهم قد الدونيا ديت كلها

نفسي اجيب مجموع كويس واخش كلية كويسه علشان اشتغل هنا في الدار واجيب كل اللي نفسي فيه ما بحلمش ابدا باليوم اللي ممكن اتجوز فيه لاني ديما بقول مين ده اللي هيقبل بواحده يتيمه ومن دار للأيتام ومقطوعة من شجرة بس بالرغم من ده بحلم ببيت دافي وانسان يعوضني ابويا واخويا اللي ما شفتهمش وما عشتش معاهم وطفل او طفله يملوا عليا دنيايا وما ابعدش عنهم ولا اسيبهم ابدا اعيشلهم واديلهم كل عمري

هواياتي بقى التريكو وشغل الأبره بيعلمونا الحجات دي في الدار وانا بعمل مفارش جميله قوي وستاير وبلوزات وحجات كتير جدا وبيطلعلي نسبه من اي قطعة بشتغلها لنفسي وكمااااان بطعم سبح بالفضة وباخد عليهم نسبة بالحتة يعني كل حتيتين تلاته اخد عليهم حبة فلوس بشتري بيهم كشاكيل واقلام وسعات قلم كحلة وصباع روج اما ابقى نفسي اعمل روحي بنت بقى وبتاع هههههههههه بحوش دلوقتي علشان اشتري جزمة بكعب عالي وطقم حلو للجامعه ان شاء الله

و ليا بنوته صغننه معانا في الدار زي بنتي بالظبط وهي بتندهلي ماما واسمها قمر يا دوب كده سنتين ونص يخببببر لو اقلكم عليها بت قمر قمر بجد
والله ما كذب اللي سماها قمر ملاك نازل من السما بت زي النسمه اما اعدي من قدامها الاقي تلحقني جري ولو عايزه تأيل العصاري ما تنامش الا في حضني واما تشوفني قدامها تجري ورايا وتمسك في رجلي وتندهلي ماما ههههههههه ولو قفلنا الباب بالليل علشان ننام وكانت مع الأم المشرفه تقعد تصرخ وتعيط وتخبط الباب وتنده عليا وانا اكلمها من را الباب لحد ما تهدي وتاخدها تنيمها معاهم في قسم المشرفات لأنها اصفر من 6 سنوات بت عسل والله ربنا يارب يخليهالي عقبالكم كلكم ان شاء الله

دار الايتام مكان كئيب وروتيني وممل خالص كل حاجه فيه عايزه تتظبط وتتنظم في شلل من البنات بتشرب سجاير وبتعمل مشاكل في الدار وبنات تانيه صايعه ومش بيهمها حد وبنات تالته كده زينا نفسها تعمل من نفسها حاجه

كده في كل مكان في الدونيا في الكويس وفي الوحش بس احنا علشان مع بعض ديما فبنشوف من ده كتير بنات بيئتهم أثرت على طبيعتهم وتكوينهم السبب في ده ممكن اننا الحمد لله يمكن ربنا رزقني بناس طيبين زيكم يحبوني واحبهم ويخافوا عليا ومحسسيني بالعيله واللمة
لكن ناس تانيين بتعاير وبتنتقص من قدرك وبتذلك وبتستوطي حيطك ليتمك مع ان ده مش بأيدك علشان كده سعات كتير جدا تلاقي القسوة والحده والعنف في طباعنا لانها بتبقى حاجه حساسه قوي وبتلزق في كرامتك وانسانيتك اما حد يفرد عضلاته عليك ويستضعفك علشانك بس يتيم

بحب حياتي رغم انها ذلاني ومورياني الويل بس صابره وراضيه على أمل اصحى من النوم على حاجه جديده ويوم جديد جميل مخبيلي سعاده كبيره جدا

هي دي انا علا البسيطه اللي عايشاها بدقة وراضيه والحمد لله على كل شيء

المايك معاكي يا .... الدور على مين خدي يا لينا







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: الفصل الرابع   الجمعة يناير 27, 2012 3:11 pm

بصوا انا هحاول انزل الشخصيات بطريقة اسرع من كده علشان تتعرفوا على القصه بشكل اسرع وتتعرفوا على الموضوع عامل ازاي ودلوقتي مع مطرقعه حقيقيه في شلة بنات ثانوي

البنات : لينا لينا لينا

لا داعي لا داعي هتكلم اهو

انا بقى اسمي لينا ههههههههه اطرقع واحده في الشله دي ما عرفش اتخبلت في عقلي ودخلت علمي علوم ازاي واللا دخلت مدرسة اساسا ليه
هوا تقريبا علشان شلتي كلها هنا بس بيني وبينكم انا تعبانه جدا من المزاكره دي وروحي طلعت خلاص ياما نفسي اتجوز بقى وانهي الموال ده بتاع المدرسه

مدرسه مدرسة مزاكره ودروس وكلام متعقد تعبني وتعب نفسيتي نفسي اتجوز سلطان بقى واخلص واخلف منه 19 ولد وبنت ههههههههه

احنا بقى عيلة كبيره جدا يجي 9 في البيت اخواتي الكبار منهم المتجوز ومنهم اللي بيشتغل وبيجوا بالليل خالص وابويا كان في السجن وخرج من شهرين كمبيالات وشيكات وكلام كبير وامي بقى بتشتغل بس بتشتغلنا ههههههه لاء حلوه والله حلوة

كله مشغول وكله بيجري ورا لقمة العيش اخواتي البنات بقى كلهم زيي كده اختي الكبيره كانت مخطوبة وفركشت الموضوع واخواتي البنات الصغيرين فاشليين زيي كده بالظبط

بحب سلطان من يجي سنة هوا بيشتغل عند الميكانيكي اللي في اول شارع بيتنا كل ما اطلع الصبح المدرسه امر اصبح عليه واديله سندوتش الفول بتاع كل يوم يفطر بيه واما اروح بقى بتشفوه وهوا جي ياخدني من المدرسة بحبه بحبه بجد هوا الوحيد اللي فاهمني ومقدرني ونفسي بقى ربنا يسهلهاله بقى ويجي يطلب ايدي من ابويا

قبل سلطان بقى حبيت كتير يجي 3 بس مش حب يعني حب بجد هوا يعني كنت بدور على الحب فيهم بس كلهم زبالة ولا حد فيهم يستاهل عالم بتتسلى وبتلعب وبتضيع وقت
بت ويتسنكحوا معاها وخلاص الا سلطان من يوم ما عرفته وهوا بيحبني وشاريني ونفسه يتجوزني بس تخلص الأمتحانات

الكل بيقول عني جدعة وبنت بلد صاحبة صحبتي وما حبش الدلع بقى والحركات المايعه دي اموت واتفرتك لو لقيت حد كده من اللي هما دلوعين بطريقة تقرف وفاضل تاكل الشيبسي بالشوكة والسكينه واخد بالك انت يا عم ابراهيم ههههههههههه

وبرضه وما حبش اللي يتنطط على كتافي اه اللي عايزاني في خدمه اديلها عيوني بس اللي تحاول تتذاكى عليا ما اقلكوش اقرقشها بسناني فكرين البت وفاء ههههههه لاء دي ما قلتهالكوش

وفاء دي كانت معايا في درس الأنجليزي وفي مره جات تقولي اصل ابويا ما معوش يدفعلي فلوس الدرس دلوقتي وهوا قالي الاسبوع الجاي وانا خايفه الأستاذ يطردني وصعبتني عليها والله كنت هعيط علشانها وهي بتقولي القصة
فا ادتلها فلوس الدرس بتاعتي على اساس تجيبهم الأسبوع الجاي بدال فلوسها واسبوع واتنين وبقيت انا اللي مش بدفع جيت قلتلها فلوس الدرس وبتاع انتي عارفه قالتلي لاء ده بكره ان شاء الله وعد خلاص
وفي بنت زميلتنا جات وقالتلي يبنت ده باباها دافع للأستاذ يجي عشر دروس مره واحده ومش محتاجه دي بتكلم بيهم صحبها المسافر في السعوديه قلتلهااااااااا نعم يختي ورحت للبت وفاء قلتلها الكلام ده مظبوط وكنا نزلين من الدرس قعدت تتوه فيا وبتاع وتقولي ما اعرف ايه وما ادرك ايه روحت مسكاها من شعرها في نص الشارع ونزلت فيها ضرب قدام الناس كلها وعضتها من ودنها واضربها بالروسية
دي فلوسي وفلوس الدرس وخدتهم تكلم صحبها ما اضربهاش وكمان بتنكر مسكتها رنيتها علقه في نص الشارع وقلتلها تجيب الفلوس بكره احسنلها وانتهى الموضوع

البنات هههههههههههه يخرب عقلك يبعيده ده انتي شلق

هعديهالكوا دي هههههههههه ولو اني مش كده انا كنت باخد حقي بس انتم عارفين انا ندمت بعديها خصوصا بعد اما اخواتي سمعوا بالموضوع وابويا كمان
صحيح محدش عاتبني ولا كلمني في الموضوع بس انا خدت احتياطي ورحت قايله لأمي اللي حصل من طق طق لسلامو عليكم علشان حصلت حاجه كده حاجه كده ابقى في السليم انا

ما تجيبوليش سيرة المذاكره واتخرج واشتغل انا نفسي اتستت في بيت ليا لوحدي واعيش هانم في بيتي واحب في الواد جوزي ههههههه بس ماليش طموحات ولا احلام غير اننا اتجوز سلطان وافرح بخواتي البنات كلهم

اهتمامات زي ما الاخوات الزميلات بيقولوا فماليش خالص اي اهتمامات ولا هوايات الا اننا بحب اروح عند اختي في الصالون اللي بتشتغل فيه عند كوافيرة بروح بقى اعمل ضوافري واسحب شعري بقى وتاتو حنة على دراعي ببلاش كله ببلاش اللي عايزه تيجي تيجي عزماكوا وعيب عليا ادفعك ميلم واحد ههههههههههه واهو بمنجه روحي على الآخر علشان اما اتمشى مع سالطونتي يشوفني اجمل واحده وعنيه ما تزوغش على غيري اه اومال ايه ده مخ ده موش بطيخة

وآدي لينا في سطور يخونا خدوا بقى كنكة البن دي من ايدي وشفولكم حد تاني يرغي هههههههههه







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: الفصل الخامس   الجمعة يناير 27, 2012 3:13 pm

دلوقتي مع بنت عاديه جدا ابسط احلامها تعيش براحتها
الدور عليكي يا عروبة

انا اسمي عروبة فلسطينية من غزة بس عشت نص عمري هون بمصر وبعرفليش بلد غيرها كنت صغيرة كثير لما ابوي نقل شغله كله على مصر وكلكوا بتعرفوا ظروف الحرب عنا بفلسطين خلتنا نهرب بمالنا وحالنا لحد ما تتصلح الأمور صحيح بعرفش شكلها لغزة ولا فلسطين بس بحبهم كثير من حكي امي وابوي عليهم اما قريبنا بيحكوا مع ابوي بالتليفون بحتار بأني لهجة بدي احكي معهم

كل الناس هانا اخوتي وصحابي بحبهم كثير وبيعوضوني كل اهلي اللي هناك

البنات : ههههههههه ايه يا عرب والنبي لتتكلمي عربي وكفايه قوي مقدمات باللغه العربيه الفصحى خلينا كده ناخد وندي بالبلدي نموت احنا في البلدي ههههههه

عروبة : هههههههههه طيب خلص بحكي بالمصري

احكيلكوا الصراحه انا بحب مصر كثير الناس هانا كثير طيبين وعفويين بحس معهم بكل الطيبه اللي بالدنيا عايشين جمب بعض وحوالين بعض زي العيله بيساعدوك ديما لو قلت بس يا فلان بجد بجد تلاقي الف واحد يساعدك من قلبه انا مبسوطة كثير اني عشت عمري وتربيت هان

البنات : ايه يا عرب انتي اندمجتي واللا ايه احنا شيفين ما فيش اختلاف خالص ارجعي بقى لطبيعتك للغة الام اللي بتكلمينا بيها بقى زي ديما الكلام الشعبي اللذيذ هههههههههههه

عروبة : ههههههه طيب خلاص هحاول ادخل في المود من تاني بس شجعوني انتم بس

اقلكم الحقيقه ابوي وامي بدهم يجوزوني ابن عمي هناك بغزة وانا بديش اتجوز بدي اظل هان مع اختي واخوي وهيهم عايشيين هان ومتجوزين من اهل البلد وبصراحه اكثر انا حابة اتجوز من هون واظل جمبهم بديش اروح هناك وابعد عن امي وابوي واخوتي
ابوي بيقولي اني راح اسافر سنة او ثنتين وبرجع معاه لهان بس انا بديش والله بديش
كل يوم يظلهم فوق راسي لحد ما صار بدي انجن واشمعنا انا يعني ما كان قدامهم اخوتي يجوزوهم من هناك
انا خايفه كثير والله وكل يوم بظل اعيط قبل ما انام وقلت لأبوي اني بدي اخلص جامعه هان قالي بتخلصيها هناك عند دار عمك شو اسوي بحالي يا ربي والله راح ما انجن دبروني وبعرفش هنا ناس غير نسايبنا اهل جوز اختي واهل مرت اخوي بس وانا بقدرش اخالفهم ولا اطلع عن شورهم والله بيذبحوني ذبح والله

احكيلكم الصراحه انا اهون عليا اموت ولا اسافر واتجوز حد ما بحبوش ولا اعرفوش حتى ولو ابن عمي بس عاداتنا عاد عنا مثل بيكول

(ابن العم ينزل بنت العم من على الفرس )

يعني لو البنت بتتجوز وخلص رايحه على الفرس لبيت جوزها بيحقله ينزلها لو بده اياه يتجوزها هههههههههه عادات قديمة وابوي لسه متمسك بيها كثير وما اجت تصير ويفكر فيها غير على دوري يا هناي انا يا سعدي

البنات : بت مش شايفه انك موصره زياده عن اللزوم ما تتجوزيش ابن عمك ده ليه في حد في بالك يعني

لاء موش الحكايه بس عارفين ليه ؟ لأني ببساطة من حقي زي اي بني ادم اختار شريك حياتي بأيرادتي من غير ما حد يفرضه عليا انا عايزه اتجوز هنا وافضل هنا
حد اعرفه حد يكلمني واكلمه مش بالمراسله اعرف اخباره وشكله وطوله ووزنه ومخلص ايه والله ظلم واكبر ظلم اللي بيسوه فيا

وانا حكيت لاخوي بسام وهو حكالي انه راح يقول لأبوي ويقنعه اني اظل هان اكمل جامعه بعدين بيحلها الف حلال لأن هوا كمان بصراحة مش موافق على الطريقة

هواياتي عاد بحب كثير الرسم والشعر وبحب كثير اسمع اسامة منير بعشق صوته والله بحس وانا بسمعه اني بسمع صدى صوتي وافكاري اللي نفسها توصل لكل العالم من على لسانه بموت علية كثير كثير كثير وبستناه بفارغ الصبر يطلع على الهوا ويتكلم

امي بقى اي حاجه انا بحبها بتكرهها مووت يعني جيبلها سيرة اسامة منير 3 مرات بيغمى عليها هههههههههههه بعيد الشر عنها طبعا بس بتقول عنه مفلسف وبدها طول الوقت هي وابوي اظل حاطه على ام كلثوم وعبد الوهاب وعبد الحليم وبتخلينيش اسمع اللي بحبهم

بس والله مش متذكره اشي ثاني هلا احكيلكوا عليه بس اذا اجا دوري كمان شوي بحكيلكوا على بلاوي بس اصبروا عليا

خذوا الكنكة دي على رأي لينا ههههههههههههه

مين مين مين دور مين خدي يا سلام







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: الفصل السادس   الجمعة يناير 27, 2012 3:14 pm

دلوقتي مع بنت عاشت في تفكك اسري أثر شويه على حياتها معاكم سلام اسمعوا شويه عن حياتها

البنات : دورك سلام

انا سلام بقى ده اسمي مش بسلم عليكم ولا حاجه ههههههههه اسمي سلام احنا اساسا اصلنا من المنيا بس جدي لأبويا جه حافي من المنيا للقاهره ايام الحرب هربان وعاش هنا بقى بقية عمره واتجوز اتنين وخلف ابويا واخواته ال 13 عاش هنا بقى واتجوز وخلفنا علشان نعيش في حياتنا دي اللي كلها مرار وذل مش هسيبكم تسألوا كتير انا ليه بقول كده بس الواقع ان ايه فايدة حياة الانسان وهوا عايش لوحده في الدونيا دي بالرغم من كثر عيلته ومحدش بيشقر عليه ولا يسال فيه حتى في عيد ربنا مثلا ايه فايدتنا في الحياة واحنا مالناش حد يودنا ويسألنا اذيكوا عاملين ايه تعبانين عريانين مرضانين

ابويا ربنا يسامحه طلق امي من زمان واتجوز ولية اعوذ بالله من دي وليه غولة بجد غولة مش كدب طويلة كده وطخينة ولية تستحق الحرق على اللي بتعمله فينا قطعتنا من الناس وحرمتنا من امنا ووزت ابويا علينا كل يوم يمسنا ويصبحنا ضرب علشان خاطرها

الحمد لله مالناش منها اخوات لأنها ما بتخلفش اساسا ربنا باليها على قد نيتها ربنا لا يسامحها يارب ويوريني فيها يوم اسود من قرن الخروب

هقلكوا على موقف تصدقوا وتأمنوا بالله انها كانت في يوم عايزة تحطلنا سم فيران في الأكل لولا اخويا كشفها ونزل فيها ضرب وكسرلها ايديها واما ابويا عرف طرده من البيت واما قاله على اللي شافه قعدت تعيط وتقوله ده كداب ده جابوه علشان تطردني من البيت وقعدت تعيط وتسوط وليه اعوذ بالله سعات بيبقى نفسي امسك سكينة المطبخ واضربها في كرشها اطلع مصرينها ولية كياده ومعفنه تسيب البيت يضرب يقلب لحد اما ارجع من المدرسة واطبخ وانضف واروق انا

واما تشفني مسكت كتاب علشان اذاكر تفضل تناديني ولو ما ردتش تقلب الدونيا عليا وتوز ابويا يضربني احنا في البيت 5 اخويا الكبير واهو ابويا طرده من يجي 5 شهور وبعد كده انا وبعدين القطاقيط الصغيرين بنيمهم في حضني ما بسبهملهاش للولية دي لتعمل فيهم حاجه لا سمح الله

نسيت اقلكم ان ابويا طلق امي اما اكتشف انها بتاخد حبوب منع للحمل من وراه وهوا كان بيقول ان الوليه طول ما ربنا خالقها بتخلف تقطع ده بأيديها ليه وكان رافض فأخوه اللي هوا عمي الصغير جاب الدوا لأمي بالخفى وقالها تخبيهم منه بعد اما تعبت جدا بعد امير اخويا الصغير واما عرف انها بتاخد الحبوب دي ضربها وطردها من البيت وبعتلها ورقة الطلاق

انا نفسي اروح لأمي اشفها واترمي انا واخواتي في حضنها بجد انا تعبت جدا محتاجالها وهوا لو سمع بس اننا زرناها يقلب علينا الدنيا وامي ست ضعيفه ومالهاش في المشاكل ترفع قواضي وتستنى وهوا عنيد وظالم

استغفر الله انا ما يصحش اقول كده بس هوا شردنا وبعدنا عن امنا وبعد عننا الناس بقينا زي المقطوعين من شجرة محدش بيودنا ولا بيسال عننا بسببه

انا امنية حياتي اننا اروح لامي بس ماليش اي طلب في الدنيا غير ده بس انا واخواتي نحس شويه اننا بين حد بيحبنا ويخاف علينا بجد واخويا بيجيني من وقت للتاني المدرسه وبيسبلي فلوس بخبيها من ابويا طبعا لو عزت اجيب حاجه لأخواتي كده والا كده

بالنسبه بقى لأحلامكم الورديه في فتى الاحلام فهي مش عندي فنا زي ما تقولوا كده بكره حاجه اسمها رجاله وابويا السبب على فكره واللي عمله فينا بس اللي بيهون عليا الخير اللي بشوفه من اخواتي الصبيان ليا ولأمي وكأنهم مش ولاده اساسا حنينين قوي عليا وعلى امي لأنهم داقوا من ظلم ابويا كتير جدا فطلعوا عكسه

عارفين سعات اما ابويا يحس اننا هنضيع من بين ايديه بينخ شويه من يجي اسبوعين امير كان بيعيط جامد جدا وانا مسكته ومسكت محمد واحمد وحضنتهم وقعدت اهدي فيهم واقلهم هنروح نزورها وكده هوا شافنا كده قعد معانا على الأرض وقعد يعيط ويضرب وشه ويقول عايزين تسيبوني لمين ويعيط بالدموع
دي هي المره الوحيده اللي اشوف فيها ابويا كده سعتها صعب عليا جدا وقعدت اعيط عليه يعيني واما شفنا كده قالي خدي خواتك بكره بعد المدرسة وقضوا النهار مع امكوا سعتها ما صدقتش ان اللي بيتكلم ده ابويا انا ربنا يهديك يابا يارب ويسامحك

البنات : ربنا يصبرك يا حبيبتي وكتير منهم واللي هما العاطفي بقى بيبكي

ما تعيطوش انا بجد ما بحبش اخش المود ده بس انتم قولتولي اتكلمي عن نفسك واهو اتكلمت غيروا بقى السيره

خدي يا منى المايك والنبي كفاية نكد بقى قولولنا حاجه تفرح

هاتهولي هنا الميكرفون ده







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: الفصل السابع   الجمعة يناير 27, 2012 3:16 pm

ايه يا سلام السيرة دي والله كنت هعيط وبعدين مالهم الطخان يعني مش كلهم وحشين هاهاهاهاها

كلمينا بقى عنك يا منى

انا منى او الشهيرة ببكبوظة الشله وسعات بيقولولي البيضه المربربه ههههههههههههه طخينه صحيح بس زي العسل مش كده والنبي ههههههههه الحالة الاجتماعيه مخطوبة واعول هههههههههههههههههههههه كنت هقول مخبوطة المهم والله ما مصدقه اننا دونا عن اللي في الفصل ده واللي اتخطبت بدري كده عمري ما فكرت ان حد ممكن يتجوزني وانا بكابوظه كده عملت يجي الف رجيم بس كله على فاشوش ما اقلكوش على ريجيم اليوم الواحد والا رجيم التونه والا رجيم الاسبوعين ههههههههههههه امشي في كل واحد يومين تلاته وارجع اسوء من الأول تقولوش عليا عمل اسمه الأكل

البنات كلها بتضحك هههههههههههههه

المهم بقى والحلو في الموضوع ان خطيبي رفيع وطويل بس ما اقلكوش بيموت فيا بيقولي عايزك كده اوعي تخسي ابدا ههههههههه بيموت فيا بعد الشر عنه يارب ان شالله فتحي ولا هوا بيحبني كده زي منا وانا بموت فيه عليه حنيه ما تتوصفش

فاكرين يبنات يوم خطوبتي

استنوا اقول للناس يوم الخطوبة بقى جابولي فستان طويل وانا قصيرة سنه مش قوي هههههههه المهم ايه جابوه ديق شويه فجت الست بتاعت بيت الأزياء وخدتلي الطول علشان تظبطه وانا نزلت بوسطي سنة علشان بس اوريهالها عايزه الفستان لفين وتررررررررررررررك مش هقلكوا على اللي حصل تقريبا عرفتوا هههههههه بقى شوارع الفستان قلتلها مش تجيبي قماشة تقيله شويه هههههههههه بس والنبي مش كان رخم الفستان انا اساسا كنت كرهاه الفستان اللبني كان احلى وكان يجنن عليا يوم الخطوبة البنات دول كلهم كانوا عندي وقعدنا في قوضتي وطول النهار للساعه 4 وهما بيجربوا فيا اللي تعملي عنيا سموكين هههههه واللي تحطلي ازرق واخضر واصفر فوق عيني واللي حرقتلي شعري ده كان يوم مهبب بس والله كان يوم جميل المهم بقيت زي البلياتشوا لحد ما جات بتاعت الكوافير كنت بقيت زي الكلاون دي ضحكت ضحك على شكلي العيال دي عبيطة عبط والله ما اقلكوش دي عملتلي حمام زيت لشعري وقالتلي دول حرقهولك وقصته وعملتلي تسريحه تانيه خالص غير اللي قلتلها عليها ههههههه

يوم الخطوبة بقى جابلي خاتم خطوبة ما احكيلكوش عليه شفتوه يجنن وجابلي انسيال وسلسلة عليها كلمة اللة وتاني يوم اما جه زارنا بعد الخطوبة كان جيبلي موبايل وشحنهولي بميت جنيه نفضل طول الليل نتكلم

خلونا نتكلم جد خطيبي مصطفى بقى عرفني عن طريق درس دين كنت بروحه مع البت سعاد جارتنا كل يوم خميس وهوا يبقى ابن عم ميس رباب اللي كان بيبقى عندها درس الدين وكان كل ما انزل من عندها الاقيه واقف انا ما كنتش اعرف انه يقربلها اصلا ولا كنت اعرف انه بيبصلي كنت فكراه بيبص على سعاد لأنها رفيعه زي عود القصب وفي يوم وانا في الدرس وقبل ما نروح طلبت مني عنوان بيتنا ونمرة التليفون وفوجئت بيها بتتصل بماما وجات هي وهوا وحمايا وحماتي قبلوا بابا وماما وطلبوني لحبيبي طفاطف

المدرسة بقى هتخلص هتخلص بس انا اتفقت انا ومصطفى اننا هنقول لبابا نأجل شويه اكون رستأت نفسي في الجامعه بعد كده اكمل واحنا متجوزين وهوا موافق يعني مش ممانع اننا اكمل خالص وعلى فكره هوا ناوي يكمل ماجيستير وبحضرلها من دلوقتي بجنب شغله وبيقولي اعملي حسابك على كده بعد البكالوريوس نفسه نبقى احنا الاتنين حاجه كبيره ومهمه ونشد على ايد بعض ونكمل

اكتر حاجه شدتني ليه بجد طيبته الفظيعه واخلاقه وتدينة الجميل وتمسكه بربنا بس بالرغم من ده برده روش يعني وطموح وعاقل واهم حاجه بيخاف عليا من الهوا الطاير ما اقلكوش عقبالكم كلكم يارب ما ربنا يرزقكم بالحد الطيب زي مصطفى حبيبي


كل ده وبكلكموا عن خطيبي

ابويا موظف في هيئة البريد القومية وبعد الظهر بيروح ورشته بتاعت البراويز بيعمل فيها براويز تجنن بيتنا كله براويز
ماما بقى ست بيت ربنا يخليهالي حبيبة قلبي وعندي اخواتي هبه و مصطفى ههههههههههه شفتوا الصدف مصطفى اخويا ومصطفى جوزي في المستقبل القريب ان شاء الله
اختي هبه متجوزة وعندها ولدين وبنت واخويا مصطفى اكبر مني بسنة ونص بس هوا وبابا بيحبوني انا واختي جدا وبيخافوا علينا بجد والحمد لله اهو سترونا احنا الاتنين وعدت

بس هي دي انا في 10 صفحات والمره الجيه اما يرجعلي الميك هقلكوا على خنقاتي انا ومصطفى شكلها ايه وطبيعتها ايه كمان سلالالام







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: الفصل الثامن   الجمعة يناير 27, 2012 3:18 pm

دلوقتي مع بنت خارجها ضحك وفرح وسرور لكن دخلها الم ووجع وتشاؤم فظيع لظروف معينة تابعوا معايا

الدور على روزانة يلله بقى يا روزانه كلمينا بقى عنك شويه ولو اننا عارفين كل حاجه


روزان انا بقى روزان او روزانة زي ما بيحبوا يندهولي صحباتي هنا يمكن ابان هاديه او مش بعرف اتكلم كتير لكن اعذروني واستحملوني مودي اليوم مش تمام ولو اني بطبيعتي ضحوكة ومبتسمه لكن اليوم هتشوفوا وش ولأول مره تشوفوه ليا سواء اللي يعرفوني بقى واللي هما صحباتي او الساده القراء

انا ليه 3 اخوات بنات و3 ولاد مش ولاد عفوا رجاله الحمد لله عايشين وبحمد الله في نعمه مع بعض وسعيدين والحمد لله محدش فينا متجوز لحد دلوقتي مع ان اخواتي فيهم اللي عدى الثلاثين بس هوا كده قدرنا عائلة مضربة عن الزواج وبأصرار فظيع
انا اخر العنقود بس للأسف يمكن ما اكنش سكر معقود قوي ههههه بس والله عيلتي بتحبني قوي وبحمد الله وصحابي كمان والدي متوفي من زمان قوي وعايشين مع والدتي ربنا يديها العمر يارب والصحه والعافيه روحنا فيها وهي كل اللي لينا في الحياة دي زعلها حاجه تخنقنا ورضاها ضحكه في وشوشنا كلنا هي ضحكتنا وفرحتنا
ربتنا وتعبت علينا واحنا صغيرين والحمد لله دلوقتي بتلاقي جزاء عملها وودها وجميلها ربنا يارب يديلها طولت العمر والصحه ويدمها تاج فوق روسنا كلنا يارب

انا مش هقولكم بقى موضوعي وقصتي بطريقة احنن بيها قلوبكم عليا او استعطفكم او حتى اعيطكم بس محتاجه افضفض لكم واقول كل شيء متخبي عني داريته يمكن كتير ولأول مره يمكن جميعا هتعرفوا الموضوع ده عني حتى انتيماتي كلهم ما يعرفهوش

انا من وانا صغيره مريضه وعندي خلل في عمل الغدة الدرقيه وعملالي مشاكل صحية كتير جدا ومأثرة اكيد عليا بالسلب عشت تلت تربع عمري بين المستشفيات والمستوصفات وامي واخواتي ربنا يخلهوملي معايا يخدوني ويودوني ويمرضوني بس الحمد لله اكبر من اننا اياس من حاجه زي دي فده قضاء ربنا ليا وانا راضيه بيه ومش مديقه وبقول ياما ناس اصغر مني ومخلوقين بالكانسر او امراض خطيرة تانيه زي تليف الكبد وفايرس سي او تشوهات خلقيه او او .......
وبحمد ربنا اننا احسن من غيري بكتير على الأقل مش بتألم او بتوجع لكن ما اخبيش عليكم الموضوع مأثر جامد جدا على نفسيتي بالسلب سعات بتمنى اموت ولا اكمل حياتي بالطريقة دي فنا ببساطة ولطول الوقت بحس اننا مش طبيعيه واننا هموت بدري ومش هسعد زيي زي اي بنت في الدنيا

استغفر الله العظيم والله ما عارفه انا ليه بعيط دلوقتي بس تقريبا هوا ده اللي حسه بيه فطلع مني بصدق

كل حاجه معكساني كل اللي بحلم بيه او بطلبه من الدنيا ما بيجيش او بيجي عكسه وبالرغم من ده كله ببان متماسكة وصلبه وبضحك وبهزر

لكن انا بجد جوايا بقايا انسان مش انسان مش عارفه هل هوا ايماني الضعيف واللا شخصيتي الضعيفه والا يمكن اكون محتاجة أعالج نفسيا ومش عارفه الله اعلم

بحب اخواتي قوي وبحب امي قوي قوي ونفسي افضل معاهم طول عمري كده وهما كمان يفضلوا معايا طول العمر

سعات بتمنى اننا اتجوز ويبقالي حد احبه واهتم بيه ويهتم بيه بس بخاف اقرب من الحته دي لأني حسه وبمنتهى الأمانه اننا هتعس الحد ده مش عارفه ليه ديما حسه اننا حتى لو اتجوزت ده فرضنا وحصل اننا مش هخلف وان جوزي هيطلقني واننا هعيش مأساه في حياتي

يمكن من كتر ما حياتي ادتني الالام فما بقتش مستنيه اي حاجه حلوه تفرحني او حياة طبيعيه زي اي بنت لأني من البدايه ما عشتهاش فبختصر الموضوع من اساسه وما بفكرش كتير

معلش استحمولوني بس يمكن ده بجد اللي حسه بيه بمنتهى الأمانه والصدق ويمكن لأول مره اعترف اعترافات خطيره بالشكل ده

عارفين حاجه وانا صغيره كان ديما العيال في المدرسه يتريقوا عليا علشان شكلي الملخبط وياما رجعت لأمي معيطه من المدرسه واقلها بيتريقوا عليا وهي كانت تطبطب عليا وتاخدني في حضنها هي واخواتي البنات .

وكمان اما كبرت ما حستش بمراهقتي ولا بعمري اللي بيكبر من الطفولة للمراهقه للشباب في المدرسة او من المجتمع اللي بره ابدا ولا اتذكر اننا خرجت مره من بيتنا ورجعت راضيه بحس ان بيتنا هوا ستري وغطايا بيحميني من عيون الناس ورذالتهم

اسعد اوقات حياتي وبأمانة عشتها وسط امي واخواتي اما نقعد يوم الجمعه نفطر الصبح والا اما كنا نلعب حاكم وجلاد مع ابويا الله يرحمه وينزل فينا ضرب بالحزام هههه بهزار طبعا واللا اما كانوا يتغالسوا على ماما وتقوم مسوطة من اخواتي الرجاله وتقوم ضرباهم بالشبشب وفي الآخر نفضل نضحك كلنا

عمري ما ضحكت من قلبي غير وانا معاهم ووسطهم حتى معاكم ما ببقاش بضحك من قلبي معاهم بس بحس اننا عندي حد يخاف عليا ويحبني بمنظري المعفشك ده ويطبطب عليا اما اعيط اوازعل

عرفين حاجه غلطت مرة وفكرت احب على اللي حصلي وكأن الشيء ده مش من البشر وكاني حيوانه ولا اسوى وماليش الحق اننا اتنازل واحب زي الناس الطبيعين واتجرحت ووعشت مكتئبه مش عارفه الدونيا معكساني ليه مع اني بحب ربنا جدا وما بغضبوش وما بفكرش اعمل حاجه وحشه والله بس هي كده مكتوبلي اعيش شقيانه واموت شقيانه

خلاص والنبي مش قادرة اكمل

البنات : لا والنبي يا روزانه اهدي طيب كل ده ومخبياه عننا احنا مش اخواتك وصحباتك كل الوقت ده وما نعرفش الحجات دي عنك اخص عليكي خلاص مش هنقولك على حاجه تاني وبعدين انتي كويسه ما تقوليش كده والله كل كلامك غلط كلنا بنحبك وبنخاف عليكي والله يا حبيبتي وبكره كلنا نفرح بيكي ونجوزك هههههههههههههه روقي بقى والنبي ما تدخليش في المود ده بقى







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: الفصل التاسع والأخير   الجمعة يناير 27, 2012 3:20 pm

دلوقتي مع الرومانسيه بتاعت الشلة نسومة

اول حاجه روزانة حبيبة قلبي انا بحبك جدا وعمرك ما تقولي كده على نفسك ده المرض ابتلاء من ربنا وقادر وحده انه يشفيكي ما تزعليش وما تديقيش افرحي وديما اضحكي زي ما عودتينا ما تعيطيش ابدا وبكرة تشوفي ان ربنا هيعوضك خير وهتعيشي سعيده



اعرفكم بقى بنسومه
انا نسومة اسمي نسمة ليا من اسمي نصيب على قولة ماما هادية جدا لدرجة تخنق كل حاجه في الدونيا دي في عيني ليها شكل وملامح لوحدها مريحة الطاسة زي ما بيقولوا ورومانسيه حبتين كل حاجه ببصلها برومانسيتي دي

انا على فكرة وحيدة ماما وبابا وده يمكن اللي مخليني انطوائيه شويه وكمان بالنسبه لناس كتير بتصرف بحرية شوية بس مش بخرج عن حدود المعقول طبعا وبحترم والدي جدا وامي جدا بس ما فيش حاجه في نفسي ابقى اعملها وبابا وماما وبيرفضوهالي بيحسوا بكده انهم عوضوني طبعا حاجه مفتقداها وهي الأخوات

احنا ساكنين في بيت جدي الله يرحمه وهوا دلوقتي لبابا لأنه وحيد جدي وجدي ده كان راجل جميل قوي وشرقي جدا الحمد لله ربنا فاتح عليه من وسع فبنا البيت ده وعاش فيه هوا وجدتي واما بابا اتجوز سكن معاهم ودلوقتي بعد ما جدي راح احنا اللي عايشين فيه

اجمل ما في الموضوع ان جدي عمل تحت بيتنا كده زي ما تكون تسوية منضفها ومعفشها واما بابا اتجوز كان جدي بيقعد فيها طول الوقت وليها باب منفصل وباب داخلي موصول بالسلم

وبما اني ثانوية عامة فنا احتليتها وبزاكر فيها وتقريبا عايشه فيها بخرج بس وقت الأكل ووقت الزيارات العائليه وده قليل جدا ووقت النوم كمان
وبابا ساعات اما بيفتكر جدي بينزل يقعد معايا تحت ههههههههههه نتكلم شويه انا وهوا وماما ويسيبوني اكمل مذاكره تاني

المكان ده بجد هوا جنتي ومرتباه بمزاجي وخليت بابا يجيبلي ورد صناعي بلاستك لونه احمر عبيت المكان بيه ونزلت كل حاجه تخصني هناك الكاسيت بتاعي والشيزلونج بتاع جدي والمكتب نزلته ده غير تلاجة جدي الصغيره والمايكرويف يعني بيت بس مصغر اجمل ما فيه انناعملاه بالطريقة اللي تريحني واللي عايزني منهم فوق يديني ميسد على الموبايل اطلعله فورا هههههههههههههههه

جدي حبيبي الله يرحمه علمني حاجتين ولحد دلوقتي بعملهم وبأصر اننا اعملهم ديما الصلاة في وقتها كنت ديما اصلي وراه كل الصلاوات وعزف الناي كان يمسك الناي يطلع منه اشي عزف حزين واشي رومانسي كان رومانسي جدا الله يرحمه ويقولي كنت اعزف لجدتك دي ويعزفلي وكنت اما ابقى زعلان منها اعزفلها دي تعرف اننا زعلان على طول هوا ما كنش محترف بس كان يحب يعمل الناي ويصنعه بأيديه من القصيب ويعزف بيهم عندي يجي 10 منهم واما افتكره لازم اقعد كده ازمر بس طبعا بيطلع نشاز هههههههههههه مش زيه الهي يارب يا جدو يرحمك ويبشبش الطوبة اللي تحت راسك

علاقتي بماما كويسه بس مش زي يعني كل البنات اللي في سني يمكن ده يرجع لأني كتومة جدا وقليلة الكلام بس بابا بيعرف يطلع مني الكلام وبيضحكني سعات كتير جدا

انا بحبهم والله بس سعات كتير بحس بفراغ بحب املاه لوحدي روايات رومانسيه ومغامرات شعر خواطر موسيقى مونامور ههههههههه يعني لو في خروجات بيبقى على الديق سوق لو فيه بيبقى كل فتره وبنزل مع ماما

خالاتي واخوالي كتير مش زي عيلة بابا فبيتنا ديما بيكون مليان عيال صغننين وكده بس بناتهم بقى حاجه تخنق وبيغيروا مني على ايه ما اعرفش وماما على طول يا عندهم يا هما عندنا
بس انا بحب اقعد مع نفسي وما بحبش الزحمة الا في حالات معينة اما ببقى سعيده ومرتاحه مع اللي بكلمهم اما غير كده فبحب الهدوء فبيعتبروه هما قلة ادب بقى وغرور فبيشوفوا نفسهم عليا بقى بدال الطاق 100000 طاق
اما بيجوا بقى عندنا بيجوا تحت عندي بيفضلوا يتريقوا ويقلولي دافنة نفسك في المذاكرة اخرجي اتفسحي شمي هوا مش عارف ايه يعني بيقوموني على وضعي او على حياتي اللي انا عايشاها ومش عارفين ان انا اللي اخترتها بأيرادتي

رغم هدوتي الا عندي سنة جنون يعني احب الحجات الغريبه الخارجة عن المألوف بس طبعا مش كل حاجه بتمناها بعملها يتقال عليا مجنونة رسمي

المدرسة دي كانت اختياري وانا اللي اصريت اننا افضل فيها طول الوقت ده لأني بحبكم جدا وما اقدرش ابعد عنكم خالص ولو ان بابا كان يقدر يوديني اي مدرسة اشاور عليها بس في رأيي كله مظاهر وكله كلام فارغ
اشمعنا بنت اخت ماما في مدرسة مش عارف ايه للغات وبنتي في مدرسة بسيطه زي دي ههههههه وكلام كتير بقى بس انا اللي صممت اننا افضل هنا يا ينقلكم كلكوا معايا هههههههههههههه ماليش دعوه يتصرف عاجبه اوك اتنقل بس كلكوا معايا

عموما ومن غير تطويل عن الجانب العاطفي فأحب اطمنكم ان لحد دلوقتي ما فيش حاجه ولا كان في والحمد لله راضيه وما تزعلوش مني انا ما بعترفش بالطريقة بتاعتكوا في الحب اوك انا رومانسيه بس والحمد لله اعرف ربنا وبحاول التزم بديني قدر المستطاع فببعد عن اي حاجه مش على مزاجي رغم ان ده متوفرلي لكني بحترم جدا ثقة والدي ووالدتي فيا وبكون قد حريتي اللي ادوهالي وقبل كده بحترم ربنا اللي شيفني في السر والعلن وعارف نيتي طبعا

بس طبعا بحب وبعيش قصص رومانسيه جدا سيبها للحظة استثنائيه جيه جيه ان شاء الله مع حد هيكون ليا بأذن الله لكن في دماغي يعني بنخرج وبنقعد في مكان هادي رومانسي وميوزك وبحر وورد يعني طقوس كده هههههههههههههههه بحب اعشها كل يوم قبل ما انام بس احبها تكون وتتوظف مع فارس احلام حقيقي شاريني وبيحبني وهيجي باذن الله في وقته وقت ما ربنا يأذن في اجمل من كده هي دي انا نسمة يارب ما اكونش دوشتكوا بالكلام الكتير اول مره اعملها وارغي كل الرغي ده







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
أمير التنانين
مشـــــــــــرف عــــام المنتــــــدى
مشـــــــــــرف عــــام المنتــــــدى


عدد المساهمات : 796
نقاط : 1146
السٌّمعَة : 0
تاريخ التسجيل : 24/07/2011
العمر : 20
الموقع : wert10090@yahoo.com


مُساهمةموضوع: النهايه   الجمعة يناير 27, 2012 3:26 pm

شكرا واتمنى ان تكون القصه عجبتكم

ملحوظة لم أستخدم اى اسم من اسماء الشات او المنتدى كى لا يزعل احد

ملحوظة اسف يا نسمة اسمك جه بالغلط

مع تحيات أمير التنانين
........................................................................................
............................................................................................
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
االنهايه







mo13 mo13 mo13 mo13 mo13 mo13 mo13 mo13 mo13 mo13 mo13
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/lool.ollo
كلاشنكوف
....
....


عدد المساهمات : 884
نقاط : 1339
السٌّمعَة : 1
تاريخ التسجيل : 18/08/2011
الموقع : janner_star5555


مُساهمةموضوع: رد: قصه من اختراعى   الجمعة يناير 27, 2012 4:19 pm

حلو اوي يا معلم
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قصه من اختراعى
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات الملكة سما :: ®––•(-• آلمنتديـآت آلعـآمـه •-)•––© :: الـمنتـدى الـعـــــــــــــــــــام-
انتقل الى: